நற்சித்திரம்

பளிச்சென இருக்கும் சட்டையை

கவனமாக இஸ்திரி கலையாமல்

காற்சட்டைக்குள் திணித்து

உடுத்திச் சரி செய்து புறப்படு.

சாலையோரக் கடையில்

தேநீர் அருந்தியதும்

பிளாஸ்டிக் குவளையை

வீசியெறிவதற்கு முன்பாக

அருகில் குப்பைத்தொட்டி

இருக்கிறதாவென தேடு.

உணவருந்தி முடித்ததும்

மறக்காமல் பரிமாறுபவனிடம்

மென்காகிதம் கேட்டு

வாயோரங்களை துடைத்து

கசக்கித் தட்டில் போடு.

வெயில் அதிகம்தான் என்றபடி

மறவாமல் அடிக்கடி

கைக்துண்டெடுத்து

முகத்தை ஒற்றியெடு.

பசி பாவனை செய்து

குழந்தையுடன் பிச்சை கேட்டு

கையேந்தும் பெண்ணுக்கு

காசு தானம் செய்.

எழுத்தின் மேன்மையைவிட

அதன் ஆளுமையே என்னை

ஈர்க்கிறது என்று

தலையிலடிக்காமல் சத்தியம் செய்.

நேரம் கிடைக்கும்போதெல்லாம்

போகிற வலைப்பக்கத்திலெல்லாம்

அருமை.. நன்றாக இருக்கிறது..

வாழ்த்துக்கள் என

ஏதாவது ஒரு பின்னூட்டத்தை

தேர்ந்தெடுத்து இடு.

எல்லோரும் ஆதரித்துப்

பேசுகையில்

என் கருத்து இதுதான் என்று

எதிர்கருத்தை முன்வை.

அவர் ரொம்ப நல்லவர்

நீங்க ரொம்ப நல்லவர்

நாங்க ரொம்ப நல்லவங்க

நீங்க ரொம்ப நல்லவங்க

என நிரம்பும் கூக்குரல்களைக்

கேட்டு மகிழ்.

கேட்டுப் புளகாங்கிதமடைந்து

உள்ளுக்குள் சிரித்துக் கொள்.

‘அகநாழிகை‘

பொன்.வாசுதேவன்