விடைபெற்றுக் கொள்கிறேன்

மரணத்தைப் பற்றிய இதுவரை
எழுதியதையெல்லாம் தயை கூர்ந்து
திருப்பிக் கொடுத்து விடுங்கள்
இல்லையெனில் மறந்து விடுங்கள்

மரணத்தைப் பற்றி அனுபவித்தறியாது
அதை உங்களுக்கு விவரிப்பது
எவ்வளவு போலியானது

வெட்டுப்படப் போவதறியாது
மழையில் நனைந்தபடி
தழையை ரசித்துச் சுவைக்கும்
ஆட்டின் உடலுதறலை
சொல்வது போலல்லவா அது

வாழ்வைச் சலித்த
கடைசிக் கணங்களில்
ஒரு அழுகையில்
மன இறுக்கத்தில்
உணர்த்திவிட இயலாத
மரணம் குறித்து
சொல்வதிலிருந்து
நான் விடைபெற்றுக் கொள்கிறேன்

மரம் இறுகிக் கல்லாகக்
கிடக்கின்ற வழிப்பாதையில்
வந்து கொண்டிருக்கும்
நீங்களே சொல்லுங்கள்.

“அகநாழிகை“
பொன்.வாசுதேவன்